تنقسم المحابس بأنواعها المختلفة الي 4 انواع اساسية من حيث طرق التشغيل
- يدوي : وده بيكون عن طريق يد او hand lever بتستخدم لفتح المحبس بشكل دوراني او طارة مع lead screw بتستخدم لفتح المحبس بشكل خطي linear زي محابس ال gate valve ، وبيتم استخدام ال gear box لتسهيل الفتح عن طريق تقليل سرعة الفتح ومضاعفة العزم المستخدم للفتح
- مشغل نيوماتيك : والنوع ده من المشغلات بيستخدم الهواء المضغوط لعمل عزم ميكانيكي حول ال Shaft بتاع المحبس فبيقدر انه يفتح المحبس بسرعة كبيرة جدا وبعزوم عالية جدا وممكن يكون rotary او linear زي بستم الهواء
- مشغل هيدروليك : وبيكون نفس فكرة المشغل النيوماتيك الا ان الطاقة المستخدمة لعمل العزم في المشغل هي الزيت المضغوط بدلا من الهواء المضغوط
- مشغل كهربي : وهو عبارة عن موتور كهربي مع جير بوكس بيحرك المحبس سواء بطريقة rotaryاو linear
في حالة تشغيل المحبس النيوماتيك ، زي محبس الفراشة مثلا ، كان المحبس بيفتح 90 درجة وفي الحالة دي كنا بنسميه quarter turn يعني فتح وقفل فقط ، وفي الحالة دي مبنقدرش نتحكم في نسبة الفتح
يعني نفترض مثلا اني عاوزافتح المحبس في وقت معين علي نسبة 20 % ، في الحالة دي بنلجأ لل positioner او متحكم الوضع
ال positioner بكل بساطة هو جهاز يقدر يتحكم في نسبة فتح وقفل المشفل وبالتالي المحبس بناءً علي قيمة معينة .
من اكتر انواع ال positioners استخداما هو ال EP Positioner أو ال Electro-Pneumatic positioner
والنوع ده بياخد اشارة كهرباء 4-20 mA او 0-10 V من الكنترولر ويحولها لاشارة ضغط يتحكم بيها في الأكتويتور ونسبة فتحه او قفله
وهنا نيجي لسؤال مهم ، ازاي ال positioner يقدر يحول اشارة الكهربا دي لحركة ميكانيكية ؟
اولا اشارة الكهربا بتوصل لحاجة اسمها I to P converter او محول اشارة التيار الي اشارة ضغط ، فكرة عمل الجهاز ده عن طريق حاجة اسمها flapper nozzle ودي فوهة موجودة في اخر المكان اللي بيخرج منه الهوا اللي هيوصل لل positioner وبيتم التحكم في فتحها وقفلها عن طريق ريشة بتتحرك عن طريق المجال الكهرومغناطيسي لملف coil
الخلاصة ان اشارة الكهربا لما بتوصل لل coil يحرك الريشة اللي فوق ال nozzle فيقدر يتحكم في اشارة الهواء اللي هي بتكون من
3-15 psi وبعدين الاشارة دي توصل للجزء الميكانيكي في الpositioner فيقدر انه يتحكم في الهوا اللي خارج وداخل من المشغل وبالتالي نسبة الفتح .
